"مبروك"

أقولّك سرّ     ؟؟؟!!!

في يوم مالأيام كنت فاكرة أني بأفتقد شخص في حياتي يهتمّ بيّا و يحتضني وقت حزني ،،، حدّ أحكّي معاه في وقت ما الإحباط بيسيطر عليّا ... لكن النهاردة بس أكتشفت إني قوية و أقدر أواجه الأيام دي لوحدي ... لكني بكون ضعيفة أوي وقت الفرحة ... فوجئت إن لحظات النجاح هي أكتر لحظات حياتي اللي باحتاج فيها لشخص يشاركني فرحتي ... و إن أيام الإحباط و الإحساس بالفشل مش أكتر أيامي وحدة ،، بالعكس ،، أشد أيام وحدتي و أكترها قسوة عليّا أمّا أعيش إنتصار و أحتفل بيه لوحدي  ...

أوقات السعادة بتبقى أكتر أوقات حياتك اللي تخلي وجود الإنسان ده معاك يوحشك بجد و تعرف وقتها أهمية وجوده في محيط عالمك ... و أبدأ أدوّر على ظل الإنسان ده في دنيتي ... إنسان بيهتم بيّا بجدّ ... عايز يشاركني فرحتي دي ... فخور بيّا و بنجاحي ... حدّ أشوف عينه بتلمع عشان شايف إبتسامتي و مبسوط بس عشان شايفني مبسوطة ... و رغم كل الناس اللي معايا و فرحانة ليّا ،، دايماً بدور على إنسان واحد بس في وسط الزحمة دي كلها ... إنسان من غيره أحسّ إني بحتفل لوحدي و إن نجاحي ده مالوش أي قيمة عشان مافيش حد بهتم إنه يفتخر بيّا أو حد بهتم إني أكون جميله في عينيه ... بفتقد وقتها الإنسان اللي حبّبني تاني في دنيتي و ملاها عليّا و كان وجوده في حياتي هو السبب الأساسي في نجاحي و تميّزي ده ...

أول ما قابلت لحظة نجاح ليّا كنت مستانياها من زمان ،،، أول حاجة جت على بالي أعملها ،،، هي إني أجري على واحد بس أعرّفه و أحتفل بنجاحي ده معاه ... عشان عارفه إنه حريص أكتر مني إنه يكون أول واحد يعرف ... كنت متأكده إنه حيكمّل فرحتي و يزوّدها أما يشاركني فيها ...

في اليوم ده بذّات ،، و في اللحظة دي ،، و أنا في قمة سعادتي و نشوتي بفوزي ... و وسط كل أصحابي اللي بيقولولي "مبروك" ... تلقائياً سبت كل حاجة و دوّرت عليه عشان أسمعها منه هو بس ...

" أنا بجد فخور بيكي " ... " مبروك " ...

جتلي الكلمة دي من صوت على مسافة بعيدة قوي عني  ،،،  لكن كان صوت قريب قوي من قلبي  ...  وقفت عندها و كأني أول مرّة في حياتي أسمع كلمة مبروك  ...  حسيت وقتها إنه جنبي  ،،  لمست نفسه أما إتنهدّ  ،،  سمعت دقات قلبه و هي فرحانه بيّا  ... جت الكلمة دي تدفيني  ،،  تكمّلي فرحتي  ،،  ترفعني من فوق أرض الواقع لأبعد سماء للخيال و العشق و الحنين  ...  فرحت بيه أكتر ما فرحت بنجاحي  ...

لو قابلتي في يوم حدّ حسّسك الإحساس ده ،، يبقي أنت أكيد .....

.
.
.
.
.
.

بتحبيه  ....

I think it is not about  " Someone in my Life "  ... But ,, It's all about  " YOU "  ...