۩۩ يوميات "أنت جيت يا رمضان ؟؟!!" -- حصرى عالتليفزيون المصري ۩۩

نجد بعد شهر رمضان من كل عام مسابقات في القنوات المصرية لتكريم المسلسلات المصرية بعد أختيار أفضل قصة ،، أفضل إخراج ،، أفضل ممثل و ممثلة ،، أفضل كومبارس صامت ،، كده يعني !!!

أما الجديد لهذا العام ،، فسنجد المسلسلات تشترك في مسابقة هي الجديدة من نوعها ... مسابقة البطل اللي حيفضل عايش لآخر حلقة ،، و دي حتكون جائزة بالتذكية نظراً لوفاة كل أبطال و كومبارسات المسلسلات واحد تلو الآخر طوال ال 30 حلقة ... و سنجد المخرج و السيناريست اللي حيقدر يقضي على كل الأبطال أسرع و في أقل عدد حلقات سيفوز بجائزة أفضل مسلسل ...

و لذلك ،، سنجد بعد كل حلقة مسابقة للمشاهدين في المنازل ،،، أرسل رسالة SMS "بإسم البطل اللي سيُقتل الحلقة القادمة" و SMS تانية "بإسم البطل اللي تتوقع إنه يعيش معانا لآخر رمضان" ... و سيتم السحب عالإجابة الصحيحة ليفوز المشاهد بالجائزة الكبرى و هي رحلة عمرة المولد ...

ده غير طبعاً البرنامج السادي "رامز ثعلب الصحراء" فحدّث و لا حرج أو إشتم و لا حرج   ...

۩۩     و رمضان كريم     ۩۩

۩۩ يوميات "أنت جيت يا رمضان ؟؟!!" -- إعلانات مصري أمّ الأجنبي ۩۩

بمناسبة أن التليفزيون أصبح يتخذ من شهر رمضان موسم لعرض الإعلانات أكثر من الإهتمام بالمسلسلات و البرامج الترفيهية كما إعتادنا زمان ... فربما نجد في نهاية الشهر الكريم مسابقات و جوائز أفضل إعلان ،،  أفضل فكرة إعلان ،، أجمل موديل ،، و أفضل  مخرج إعلاني بدلاً من مسابقات أفضل مسلسل و خلافه  D:

و بناءاً عليه أعتقد فيما أعتقد إن لو فكرة الإعلان المصري كانت مرتبطة بالمنتج اللي بيقدّمه الإعلان نفسه ،،، كانت تبقى حاجة ظريفة خالص ... خسارة إهدار كل هذه الأفكار الرائعة و الأموال الباهظة و المواهب المبهرة في منتجات لا تمتّ للإعلان بصلة !!!

------------------------------------------------------------------------

هي الرجّالة "الفخيمة" اللي في إعلانات لموأخذة "قطونيل" عارفين نوع المنتج اللي بيعلنوا عنّه ؟؟!!   ولّا همّا جيبين منين الثقة في النفس المتناهية و الشموخ في جملتهم الشهيرة  "أنا قطونيل" ؟؟!!

و اللهي عيب أوي !!!

------------------------------------------------------------------------

بالرغم من عدم توافق المنتج بفكرة الإعلان لكن عجتني الفكرة عشان أغلب الحالات و المواقف اللي ذكروها مواقف واقعية جداً ،،، و خصوصاً :

" - و لكل راجل عزم صاحبته على العَشاء ،،، و قسّم معاها الحساب "

و يردّ الراجل على صاحبته في المطعم ممسكاً الشيك بيده : " - أنتي خدتي بطاطس ؟؟!! "

صحيح !!! الإعلانات مابتجبش حاجة من عندها ... بتحصل وربنا ...

و برضه عيب أوي !!!

------------------------------------------------------------------------

۩۩    و رمضان كريم   ۩۩

۩۩ يوميات "أنت جيت يا رمضان؟؟!!" -- ماريّا ۩۩

التاريخ: في بداية رمضان 2012 مش مهم اليوم

المناسبة: إفتتاح قناة "ماريا" للمنقبات

إستفسار بسيط حول قناة "ماريا" للمنقبّات   ...   ليه ماتكنش الفكرة دي على شكل موجة على الراديو مش قناة تليفزيونية ؟؟!!      معتقدش حتفرق كتير يعني     ...     ولّا هي مصاريف و سحب كهربة على الفاضي في وقت النور بيقطع علينا فيه مرتين يومياً ؟؟!!     مش مصر أولى بالكهربة و الإضاءة دي كلها ؟؟!!

معلومة: ده سؤال إستفهامي لا تعجبّي !!!

۩۩      و رمضان كريم     ۩۩ 

عظمة على عظمة يا ستّ

بعيداً عن أجواء الزخم السياسي ،، و المزايادات على الوطنية ،، و الصراع على السلطة ،، و الحراك السياسي ،، و بغض النظر عن المؤامرات المحاكة ضد الوطن ،، و جميع الأيديولوجيات ،، و الباريجماتية ،، و القوانين الفاشية ... و كل المصطلاحات التي تم إكتشافها مؤخراً في المعجم العربي و اللي مالهاش أي تلاتين معنى ...

فنجد الفنانة و المطربة الستّ إليسا تهلّ علينا بطلعتها البهية بمعاني أهم و أقيم بكتير الصراحة عشان تطلّع المواطن المطحون من الوحلة السياسية اللي هو فيها ... حاجة كده يعني تألِب أحلى مواجع P:

حقيقي ،،، الله يا ستّ !!!

أحبيبتي أستّ إليسّا !!!