في مجتمعنا تنتشر ثقافة غريبة تستحق الدراسة ،،، أموت و أعرف إيه علاقة الحالة الإجتماعية للكائن البشري بمدى نجاحه أو فشله في الحياة بصفة عامة ... دايماً في إرتباط وثيق بين فكرة الإرتباط و كون الإنسان أعزب/أنسة أو متزوج/متزوجة و بين تقييمها و تقييم ثِقَل عقليتها و صحة أفكارها و آرائها ...
يعني مثلاً موقف بيتكرر شبه يومياً ،،، ليه دايماً أما واحد مش مرتبط - أو سينجل يعني - يجي ينصح واحد مرتبط أو واحد داخل على إرتباط جديد - بمعنى أصحّ بيظبّط - نصيحة متعلّقة بحياته العاطفية ... ساعتها بيتعرّض لنظرة من المرتبط ده كلنا عرفينها و شوفناها قبل كده ،،، و يقوله في سرّه و ساعات بيقولها بصوت عالي في وشّه مش في سرّه ولا حاجة : "و أما أنت عاقل أوي كده ،، مانفعتش نفسك ليه ؟؟!!" ...
بنقابل كل يوم عقليات بتفكّر بمدأ غريب أوي ،، إن الإنسان الأعزب ده أكيد فاشل ... محدّش ينكر إنه أكيد سمع جمل كتير شهيرة زيّ : "دي أكيد بنت خايبة بتتنك عالفاضي" ،،، "دي مش عارفة توقعلّها واحد ولّا تلقطلها عريس و تدبّسه في جوازة زي باقي البنات الناصحة" ... ولّا الأقوال المأثورة مثلاً : "ده بيقولوا عليه مقضّيها مع كل بنت شوية و مش ناوي يتلمّ في بيت" ،،، "أصل دي مين دي اللي تطيق تتجوزه و تعمّر معاه في بيت واحد ؟؟!!" ،،، "ماشي كده مش عاجبه واحده و هو أصلاً مافيش بنت عاقله ترضى تعاشره" ...
مع إن في حقيقة الأمر ممكن جداً نبصلّها من زاوية تانية ،،، ماهو أصل السينجل ده عشان يبقى سينجل أكيد مرّ بتجارب كتير أوي و فشلت ... و من كل تجربة بتفشل بيخرج منها أقوى ،، و بيطلع بمعلومة جديدة و بدرس إتعلمه ،، و هو ده اللي بيسمّوه "الخبرة" ... عمر ما الخبرة بتيجي من عدد الكتب اللي قرأناها ... وظيفة الكتب في حياتنا بتقتصر على طرح مفاتيح للإنسان لبناء شخصيته عشان يبدأ يعيش تجربته الشخصية و يكتب قصة حياته هو ... لكن عمر ما في إنسان نجح بس بكتاب ... إحنا محتاجين نغلط و نفشل و ندخل تجارب و قصص و نسمع قصص واقعية حصلت للمحيطين بينا عشان نبني خبراتنا و آراءنا بجانب العلم و الكتب ...
و نرجع بقى لمرجوعنا و هو الإنسان السينجل أو أي إنسان تاني عاش فترة كبيرة في حياته سينجل و طلع عينه لحد ما إرتبط ،،، فالإنسان ده بقى عنده خبرة أكبر بكتير من إنسان تاني إرتبط بأول إنسان قابله في حياته و ربنا رزقه بنصيبه من أول لفّه ... و أهو الإسم إنسان مرتبط ناجح ... لكن في الحقيقة النجاح ده مش دايماً عشان الإنسان شاطر و زكي و عاقل ،، ساعات بيكون حالة فريدة تحققت بمحض الصدفة و القدر (بالبلدي كده حظه حلو) ... طب أما هي الحكاية كده ،، يبقى ليه بقى بنتفّه من رأي و نصيحة السينجل لمجرد إنه لسه منجحش في علاقة ؟؟!!
و لو بصّينا لنفس الصورة بس من زاوية تالتة ،،، إحتمال نلاقي السينجل ده مش لازم يعني يكون مرتبطش عشان فيه عيب في شخصيته ،، أو إنه مش خبير في سيكولوجية البنت (لو هو ولد) أو الولد (لو هي بنت) ،، ولا بسبب إنه هو اللي بيغلط في كل قصة بتنتهي ،، أو عشان هو تافه و عديم الخبرة لدرجة إنه مش قادر يحتوي مشاكله مع الطرف الآخر ...
لكن ليه مانقلش إنه عاقل جداً ،، فاهم حقيقة الدنيا ،، ناجح في شغله ،، محبوب وسط أصحابه ،، و ليه آراء ثبت صحتها مع مرور الوقت ،، واقعي و ليه رؤية و مبادئ رزينة إكتسبها من تجاربه و تجارب اللي حواليه فأصبح شخص ليه خبرة و عقلية متزنة جداً .. لكنه ببساطة لسّه ماقبلش Mr. or Mrs Right ... و فضّل إختيار الفرصة الحقيقية للسعادة حتى لو تطلب منه الإنتظار طويلاً بحثاً عن حلمه مع إكتسابه لخبرات و دروس جديدة كل يوم بيعدّي عليه ...
طب بلاش كل ده ... لو بصّينا للصورة من نفس زاوية مجتمعنا ،،، يبقى والنبي يعني ناخد برأي واحد إتطحن في الدنيا و جرّب مرارة الفشل في تجاربه لأسباب مختلفة كل مرة بس لسه بيحاول بأمل عشان ينجح و لم ييأس؟؟!! ولّا نصيحة حدّ نجح بالصدفة البحته في أول تجربة عدّت عليه ؟؟!! مين فيهم حتكون قصصه أفيد للتعلم منها و من أخطأها ؟؟!! ماهو زي ما بنتعلّم من القصص ذات النهايات السعيدة أكيد حنتعلم أكتر من قصص الفشل أيّاً كان أسباب عدم نجاحها ...
لازم نطوّر من ثقافتنا ،،، مش لازم أبداً يكون السينجل ده حد فاشل ،، تافه ،، لا يعاشَر ،، أو دايماً في كل مرًة مخطئ في حق من إرتبط بيه ... ممكن جداً يكون هايل و حكيم زمانه و مايتعايبش زي ما بيقولوا بس للأسف لسّه مالقاش نصّه التاني اللي بيكمّله ... و نصيحة يعني ،، أما تلاقي الإنسان ده بينصحك ،، إسمع منه مش حتخسر حاجة ،، ماهو أكيد إتمرمط في حياته و المرمطه دي مش ببلاش برضه .. أكيد طلع منها بحاجة مفيدة ليه و لغيره ...
و ربنا يهدّي النفوس D:
لازم نطور من ثقافتنا..فعلا ده الصح.
ReplyDelete..التدوينة جميلةوالأفكار فيها جميلة و بناءة،يمكن دي فعلا نظرة أغلب الناس للعزاب على أساس إنهم مش قليلي الخبرة بل معدومي الخبرة !!لكن في ناس بتحترم الرأي أيا كانت الحالة الإجتماعية لقائله لإيمانه أن في كل الأحوال سواء اكان فشل أو نجح فهو إستفاد و مش عيب إني أستفيد من اللي هو أستفاده..الموضوع مهم وكنت اتمنى أقدر أعلق بتعليق بناء،ولكني بصراحة في فترة خمول فكري،لكن الموضوع عجبني ولم أستطع الخروج بدون كتابة تعليق..كل التحية.