مونديال 2014 ... كوكا كولا

13/7/2014

في ناس كتير أوي مقتنعين إن فكرة حملة  "‫‏كوكاكولا أحلى مع‬..."   ناجحة جداً بس برضه حيشربوا ‫‏پيپسي‬ ...

... أنا من الناس دول ...

كمان في ناس كتير مقتنعين إن ‫‏ألمانيا‬ تستحق اللقب بس برضه كان نفسهم‫‏الأرچنتين‬ تكسب ...

... و أنا برضه من الناس دول :((( ...

مونديال 2014 ... Bye Bye Argentina

13/7/2014

Germany Vs. Argentine  1-0

ميركل قابلت مرسي فإتخلع في نفس السنة بمعجزة إلاهية  ...

الست كان وشها حلو عالمصريين  ،،  فأكيد وشها حلو على شعبها من باب أولى  ...  حضرتلهم الماتش بالچاكيته الحمرا  ،،  العيال رجعوا معاها لبلدهم بالكاس  ...

بس يا ريتها ماكنت تعبت نفسها و كلفت خاطرها و راحت  ،،  كان زمانّا دلوقتي بنحتفل بأولاد مارادونا  ،،  أرچنتيناااااااا بدل الألمان ولاد السخيفة دول  ...

مونديال 2014 ... فضيحة البرازيل

8/7/2014

Brazil Vs. Germany 1 - 7

ده حتى على سبيل الأصول  ،،  ماينفعش ضيف يغلط في واحد مستضيفه و يهزأه أوي كده في بيته و قصاد عيلته و عياله كمان  ،،  لا و يصورها و يزيعها عالجزيرة  !!!  يعني كان ماله لو كسبوا 1-0 يعني  ؟؟!!

زمن مايعرفش لا عيب ولا حرام 

‫

مونديال 2014 ... Latin America II

Italy  Vs.  Uruguay  ...  0-1

هو كاس العالم إيه غير تشيلي و كوستاريكا و حبة دول لاتينية فوق بعض  ...

كان من المقرر إن أمريكا اللاتينية تستضيف مبارايات كاس العالم بشكل عام ،،، هي بقى قررت تستضيف الكاس ذات نفسه و تكمّر عليه ،،، طب كانوا يقولوا نيتهم مالأول ووفرنا وقت و جهد و مصاريف و حرقة دم في متابعة التصفيات و بعدها سفر اللاعيبة و المشجعين و ريسيڤرات الجزيرة ... كان لازمته إيه الغلب ده كله ؟؟!!

مونديال 2014 ... Latin America I

Italy Vs Uruguay  ...  0-1

ودّيتوا فِرَق أوروبا فين يا حازم   !!!

أجي أتفرّج على الدور ال 16 مالاقيش ولا دولة أوروبية بتلعب  ؟؟!!!

مونديال 2014 ... اللاعب المصري

France Vs. Switzerland  5 : 2 

" الفريق خسر بسبب الحالة النفسية لللعيبة و الإحباط اللي صابهم بعد دخول أول جول فيهم من الفريق المنافس "

دي جملة ما تسمعهاش غير من معلق مصري بيعلق على ماتش لفريق مصري ... اللاعب المصري هو الوحيد في العالم اللي بيلعب بحالته النفسية مش بمهارته أو خطة فريقه ...

عن لاعبي سويسرا أتحدث اللي جابوا جولين في آخر الشوط التاني رغم إن في كل الأحوال خاسرانين ب 5 أجوال بحالهم ... يعني مافيش أكتر من كده إحباط و حالة نفسية في الأرض ...

اللاعب المصري مكسّح بطبعه !!!

مونديال 2014 ... هلاوس كأس العالم

Italy Vs. Costa Rica 

يبدو إن ألمانيا حتكون الفرقة الوحيدة اللي حتوصل للنهائي ،،، و بكدة حتكون أول مرة في تاريخ كرة القدم فريق ياخد كاس العالم بالتذكية ...

و إحتمال دي تكون الطريقة الوحيدة اللي تخلي فانلة بيضاء تتغلب على العنة و تلمس كاس ...

مونديال 2014 ... Cheerleaders II

جوة كل إنسان منا حمدي وزير صغير بيظهر مع بداية كل ماتش لفرق بعينها في كاس العالم ...

حملة إقتل المتحرش اللي جواك ،،، فغضّ بصرك يا إما إقفل التليفزيون لو فالح ...

مونديال 2014 ... Cheerleaders I

Brazil Vs Mexico

المواطن المصري محتار ،، مش عارف يركزّ مع لعب فريق البرازيل ولّا مع لعب "مشجعي" فريق البرازيل  !!!

مونديال 2014 ... Pepsi Cans

Ghana Vs USA

في 10 Pepsi Cans مقلوبة على بوءها و بتجري في الملعب ...

مونديال 2014 ... الفانلة البيضاء IV

Ghana Vs USA

جول في الدقيقة قصدي في الثانية ال 00:20 يا كفرة ؟؟!! يعني ده اللي كان لسه بيدور على قناة الجزيرة أو اللي كان لسه بيقعد عالكنبة و بيدور عالريموت عشان يعلّي الصوت زي حالاتي أكيد فاته الجول  ...

ماهو أصل العيب عاللي لابسين الفانلة البيضة لا و stretch و ب"كينار" مزركش كمان مش أي كلام يعني  ...

مونديال 2014 ... الفانلة البيضاء III

Germany Vs Portugal 16/6/2014

عذراً  ،،،

يمكنك لعب كرة القدم بفانلة بيضاء  ،،  فقط إذا كنت تمتلك  "الماكينة"  الألمانية  ...

مونديال 2014 ... الفانلة البيضاء II

16/6/2014

من قوانين الرياضة في العصر الحديث ،، و بعد هزيمة كل من أسبانيا ،، إنجلترا ،، هندوراس ،، و غانا ...

"أوعى تلبس أبيض و أنت بتلعب كرة قدم"

الفانلة البيضة راكبها جوست  !!!

مونديال 2014 ... الفانلة البيضاء I

Italy Vs England  15/6/2014

إنجلترا لابسه أبيض ؟؟!! إذاً مبروك على إيطاليا الماتش إن شاء الله :))

روح الزمالك الشريرة بتحوم في قلب الإستاد ...