مونديال 2014 ... Latin America II

Italy  Vs.  Uruguay  ...  0-1

هو كاس العالم إيه غير تشيلي و كوستاريكا و حبة دول لاتينية فوق بعض  ...

كان من المقرر إن أمريكا اللاتينية تستضيف مبارايات كاس العالم بشكل عام ،،، هي بقى قررت تستضيف الكاس ذات نفسه و تكمّر عليه ،،، طب كانوا يقولوا نيتهم مالأول ووفرنا وقت و جهد و مصاريف و حرقة دم في متابعة التصفيات و بعدها سفر اللاعيبة و المشجعين و ريسيڤرات الجزيرة ... كان لازمته إيه الغلب ده كله ؟؟!!

مونديال 2014 ... Latin America I

Italy Vs Uruguay  ...  0-1

ودّيتوا فِرَق أوروبا فين يا حازم   !!!

أجي أتفرّج على الدور ال 16 مالاقيش ولا دولة أوروبية بتلعب  ؟؟!!!

مونديال 2014 ... اللاعب المصري

France Vs. Switzerland  5 : 2 

" الفريق خسر بسبب الحالة النفسية لللعيبة و الإحباط اللي صابهم بعد دخول أول جول فيهم من الفريق المنافس "

دي جملة ما تسمعهاش غير من معلق مصري بيعلق على ماتش لفريق مصري ... اللاعب المصري هو الوحيد في العالم اللي بيلعب بحالته النفسية مش بمهارته أو خطة فريقه ...

عن لاعبي سويسرا أتحدث اللي جابوا جولين في آخر الشوط التاني رغم إن في كل الأحوال خاسرانين ب 5 أجوال بحالهم ... يعني مافيش أكتر من كده إحباط و حالة نفسية في الأرض ...

اللاعب المصري مكسّح بطبعه !!!

مونديال 2014 ... هلاوس كأس العالم

Italy Vs. Costa Rica 

يبدو إن ألمانيا حتكون الفرقة الوحيدة اللي حتوصل للنهائي ،،، و بكدة حتكون أول مرة في تاريخ كرة القدم فريق ياخد كاس العالم بالتذكية ...

و إحتمال دي تكون الطريقة الوحيدة اللي تخلي فانلة بيضاء تتغلب على العنة و تلمس كاس ...

مونديال 2014 ... Cheerleaders II

جوة كل إنسان منا حمدي وزير صغير بيظهر مع بداية كل ماتش لفرق بعينها في كاس العالم ...

حملة إقتل المتحرش اللي جواك ،،، فغضّ بصرك يا إما إقفل التليفزيون لو فالح ...

مونديال 2014 ... Cheerleaders I

Brazil Vs Mexico

المواطن المصري محتار ،، مش عارف يركزّ مع لعب فريق البرازيل ولّا مع لعب "مشجعي" فريق البرازيل  !!!

مونديال 2014 ... Pepsi Cans

Ghana Vs USA

في 10 Pepsi Cans مقلوبة على بوءها و بتجري في الملعب ...

مونديال 2014 ... الفانلة البيضاء IV

Ghana Vs USA

جول في الدقيقة قصدي في الثانية ال 00:20 يا كفرة ؟؟!! يعني ده اللي كان لسه بيدور على قناة الجزيرة أو اللي كان لسه بيقعد عالكنبة و بيدور عالريموت عشان يعلّي الصوت زي حالاتي أكيد فاته الجول  ...

ماهو أصل العيب عاللي لابسين الفانلة البيضة لا و stretch و ب"كينار" مزركش كمان مش أي كلام يعني  ...

مونديال 2014 ... الفانلة البيضاء III

Germany Vs Portugal 16/6/2014

عذراً  ،،،

يمكنك لعب كرة القدم بفانلة بيضاء  ،،  فقط إذا كنت تمتلك  "الماكينة"  الألمانية  ...

مونديال 2014 ... الفانلة البيضاء II

16/6/2014

من قوانين الرياضة في العصر الحديث ،، و بعد هزيمة كل من أسبانيا ،، إنجلترا ،، هندوراس ،، و غانا ...

"أوعى تلبس أبيض و أنت بتلعب كرة قدم"

الفانلة البيضة راكبها جوست  !!!

مونديال 2014 ... الفانلة البيضاء I

Italy Vs England  15/6/2014

إنجلترا لابسه أبيض ؟؟!! إذاً مبروك على إيطاليا الماتش إن شاء الله :))

روح الزمالك الشريرة بتحوم في قلب الإستاد ...

أتشششييييييييييييييييي

That awful moment

عندما تتحوا مِيمَك   " م "   إلى باء   " ب "   ...

You feel like

يهدّه البرد  ...

Relationships Clues !!!

عزيزي الحبّيب  ،،،  عزيزتي الحبّيبة  ...

إليكم تفسير موجز لبعض مفاهيم العلاقة العاطفية الغير مفهومة  ...

-  لمّا تكوني عارفة و متأكدة إن طبيعتك مش مرأة غيورة  ،،،  و إذ فُجأةً تحسي و لأول مرّة في حياتك إنك بتغيري على حدّ  ...  ده مش معناه إنك مش واثقة في نفسك أو إنك بتشكّي فيه  ...  

Absolutely

...  ده معناه إنك لأول مرّه بتحبي بجد  ...

آه والله  !!!  أصل لو لسه ما حبيتيهوش مش حيفرق معاكي بيكلم مين أو مين نفسها تفوز بيه  ...

بمبدأ  " مع السلامة و القلب دعيلك يا أموووور "  ...

-  لمّا تكون حبيبتك معروف عنها إنها شخصية عاقلة و راسية  ،،،  و إذ فجأةً تلاقيها بتيجي عالهايفة و تتصدّر و بتتخانق معاك على أبسط حاجة  ...  أياك تفتكر إنها بقيت تافهه على كبر  ...

Absolutely

...  أعرف إنها كده بقيت بتحبك بجد  ...

شوفت بقى إنك ظلمها  !!!  ماهي لو مش بتحبك بجد  ،،  مش حتحب علاقتكوا و يبقى طول الوقت نفسها توصل بيها للمثالية في أدق تفاصيلها و تتنرفز أوي لو ملامح الصورة اللي في دماغها إتلخبطت شوية لأي سبب  ...  يعني مش حتتعب قلبها معاك في المناهدة لو أنت مش فارقلها  ...

بمبدأ  " الباب اللي يجيلك منه لوأخذة الريح سدّه و أستريح "  ...

-  لمّا تكون طبيعتِك أصلاً هادية و تكاد تكون باردة  ،،،  و إذ فجأةً تبدأي تخانقي دبّان وشّك من غير سبب و تكتشفي إن كل التوتر ده لمجرد إنه غاب عنك يوم واحد  ...  أوعي تفتكري إنك بقيتي شخصية متسلطة تافهه و متوترة  ...

Absolutely

...  أنتِ كده عشان واحشك عشان ببساطة بقيتي بتحبيه بجد  ...

آه والنعمة  !!!  ماهو لو مش بتحبيه مش حتوجعي قلبك ولا حيفرقلك وجوده من عدمه  ...  بالعكس ،، في ناس عدمه بيبقى أريح  ...

بمبدأ  " القرب منك شحططة  ،،،  و البعد عنك مرمطة "  ...

إسمع مني بقى  !!!  المهم إن بعد ما نعدّي على المطبات دي كلها  ،،،  إننا نفهم إن دي أعراض الحب الحقيقي و الواقعي مش حب الأفلام العربي  ،،،  فنرجع في آخر اليوم نهدّي اللعب و نصالح بعض  ،،،

مِالآخر ،، مانسقش فيها يعني  ...  

عبّرني شكراً

الموبيل اللي حيلتي باظظظظظ  !!! ...

و لليوم العاشر عالتوالي أواجه مرحلة بمثابة تجربة قاسية من إنقطاع ال (Whatsapp) و غياب كل النمر من ال Contact List ... أعيش أجواء العودة إلى حقبة ال Nokia مرة أخرى مما أدى إلى إستبدال ال BBM بخدمة ال SMS مع 2 ،، 3 ،، أو 4 فقط من أصدقائي اللي في الحارة الضيقة اللي عرفت أتوصّل لنمرهم مع محاولة التواصل مع العالم الخارجي عبر ال Facebook Chat و ال FB Inbox ... ياااااااااااا كانت أيام واللهي ...

إنها حقّاً تجربة عصيبة  !!!

- "أوعدوني .. مهما كان مش حتسبوني" ... أقوال مأثورة !!!

Je parle francais comme les oiseaux !!!

بعيداً عن الأحداث الأخيرة و عن المازنأ اللي إحنا فيه ... و أنا مروّحة مالشغل اليوم و بسمع مزيعة عالراديو بتنقل خبر تظاهر طلاب و أهالي طلاب مدرسة "الليسيه" إحتجاجاً على إحتلال الشرطة لأسطح المدرسة ...

و ألاقي المذيعة بتحط ال "تتش" بتاعها ة تقولك يا بيه : طبعاً الطلاب و أهلهم معاهم حق و من حقهم متابعة العام الدراسي في جو هادئ و ربنا معاهم و نهديلهم بالمناسبة دي أغنية "فرنسية" مساندة ليهم ...

-- "طب و المصحف منا رادد"

Felix Vs Egyptians !!!

فليشهد التاريخ أن النمساوي فيليكس دخل التاريخ من أوسع أبوابه و سجل أسمه في موسوعة جينيس للأرقام القياسية للسقوط الحر بعد أن إخترق الغلاف الجوي و وصل كوكب الأرض في فترة لا تزيد عن ال 3  دقائق و يوجد إحتمالات لإختراقه لحاجز الصوت  ...

و من مصادفات القدر أن في نفس الأسبوع ذاته يدخل المواطن المصري أيضاً التاريخ من أوسع طرقه ليسجل أسمه في موسوعة جينيس للأرقام القياسية للصبر بعد أن إخترق طريق مصر إسماعيلية الصحراوي و وصل مصر الجديدة في فترة لا تقل عن ال 3  ساعات و يوجد إحتمالات مؤكدة لإختراقه لحاجز الصمت و ضبط النفس و الأداب العامة  ...

إسماعيلية بقيت رايح بس ،، مافيش جاي خالص بقى !!!