هو إحنا بنقابل كام واحد في حياتنا خايف من سنّه ؟؟!! بنشوف كام واحدة بتتكسف تقول عمرها الحقيقي ؟؟!! حضرنا عيد ميلاد كام طفل و شفنا الفرحة ملياه عشان كبر و بقى عنده " فور " ؟؟!! ممكن تسأل البنت أي سؤال و تجاوب عادي ،،، لحدّ ما تيجي على الرقم ده و تحس ساعتها إنك سألتها سؤال أبيح ... يحتفل بأعياد ميلاد أصحابه و هو فرحان ،،، لكن يجي على يوم عيد ميلاده هو و يدخل شرنقة الإكتئاب و يبطل يرد أصلاً عالموبيل ...
ما هو المقصود بكلمة " عمر الإنسان " ؟؟!!
طيب هو اللي بيسألك عن سنّك ده بيسأل ليه ؟؟!! عايز يوصل لإيه من إجابتك ؟؟!! حيفرقله في إيه أنت عشت كام سنة في الدنيا دي ؟؟!! يعني السؤال " عندك كام سنة ؟؟ " ده بيتسئل صح ولّا الأصح إنه يكون " قيمة عمرك كام سنة ؟؟ " ؟؟!!
أكتب ما تعرفه عن مدلول " عمر الإنسان " ؟؟!!
هو السنّ ده هو الرقم اللي أنت شايله ،،، و بتحسبه بناءاً على التاريخ اللي مكتوب في شهادة ميلادك ؟؟!! التاريخ اللي نوّرت فيه الدنيا ؟؟!! هو ده عمرك الحقيقي ؟؟!! ولّا المفروض يتحسب السن بالأيام المهمة اللي عشناها ؟؟!! الأيام اللي أثّرت في شخصيتنا و في مسار حياتنا ؟؟!! يعني مثلاً اللي يقولك عمري 30 سنة ،،، تفتكر هو عاش كام سنة في ال 30 دول ،،، و لسّه فاكر تفاصيل كام يوم في السنين دي ؟؟!!
أحياناً أقابل حدّ - بثقافتنا - نقول عليه صغير سناً لكنه من كلامي معاه بطلع بخبرات كتير أوي ،،، و يديني رأي في مشكلتي الأيام بس هي اللي تثبت صحة رأيه ده و حكمته و كبر سنه الحقيقي ... و في أوقات تانية يصادفني شخص عاش في الدنيا عدد سنين كتير و عدّي بتجارب مش قليلة ،،، و مع كده أشفق عليه من تردده و صغر سن عقله و كأنه مولود إمبارح بلا خبرات أو دروس إستفدها من أيام صعبة عدّى بيها ولا أيام حلوة عاشها ...
ما هو في يوم بيعدّي عليك ممكن ماتطلعش منه بأي حاجة مفيدة لكن حيتحسب في الرقم برضه ... و ممكن يوم تاني يعدّي عليك تتعلم فيه درس ماكنتش حتتعلّمه لو عشت عشر سنين كمان ... يبقى هل يُعقل أن يوم بالقيمة دي يتساوى في الرقم مع يوم تاني عدّى عادي و مش فاكرينه أصلاً ؟؟!!
" عندك كام سنة بجدّ ؟؟!! "
لو في يوم سألتني " سنِك كام ؟؟!! " ... هل من العدل أني أقول الرقم السطحي بعيداً عن كل الحسابات المعقدة دي ؟؟!! أقول عدد السنين اللي عدّت عليا من يوم ميلادي للحظة ما إتسألت السؤال ؟؟!! ولّا من المنطقي إني أقول عدد السنين اللي عشتها بجد ؟؟!! عدد الأيام اللي تستحق إني أفتكرها و كانت السبب في إني أكون " أنا " بملامح شخصيتي و معتقداتي دلوقتي ؟؟!! قاصدك تسألني عن عدد السنين ولّا عدد الخبرات و التجارب اللي عايشتها و تفاعلت مع أحداثها ؟؟!! عايز تسمع رقم يدل علي قيمة الأيام اللي أثّرت في حياتي و إختياراتي ولّا مجرد عدد بغض النظر عن قيمتها ؟؟!!
هل " عمر الإنسان " يحسب بقيمة أم بعدد الأيام و اللحظات اللي عاشها ؟؟!!
و نظراً لإعتراضي الدائم على ثقافة بني البشر و موروثاتنا الغير صحيحة ،،، قررت إني أعلّم عمري ... لازم أعمل لكل يوم عايشاه علامة ... أطلع من كل يوم في عمري بحدث أتفاعل معاه ،، درس جديد أستفيد منه ،، شخص يدخل دنيتي و يسيب فيها علامة إيجابية سواء سعيدة أو حزينة ،،، ثقافة جديدة أتعلمها من كتاب أو من مناقشتي مع صديق ناضج ... عشان أما أرجع لشريط عمري اللي عدّى أقدر أفتكر كل يوم و أستمتع و أنا بتفرّج على فيلمي اللي كتبته و أخرجته و حددت أبطاله و رسالته بنفسي ...
أتعوّد تطلع من يومك بأي علامة ... أكتب قصة كل يوم في كتابك بخط جديد أو لون مختلف يميزه ... ماتسبش عمرك يعدّي كده عادي و مملّ ... أبني حدوته يومية تستحق إنك تحكيها لغيرك ... و أوعى تقيّم الإنسان برقم أو بتاريخ مكتوبله في أوراق الحكومة ،،، لكن ركّز أحسن على عمر عقله و سن شخصيته و عدد خبراته ... " Quality but NOT Quantity " ... عشان الأكبر منك بيوم مش دايماً بيعرف عنك بسنة ...
علّم أيام و سنين عمرك !!!
